Hasi da. Dagoeneko ez dago inor geldituko duenik. Baten batek zabaldu du euskal globosferan (euskal blogosferan hobe esanda) Gasteizen bizia dagoenaren berria. Gorbeia puntatik maldan behera botatako elur-bola erraldoi baten gisa, zurrumurrua hiriraino heldu da eta bere zutabeak gogor astindu ditu.

Santa Maria katedrale puntatik Abetxukoko etxerik urruneneraino, guzti guztien ahotan dabilen kontua da: “Gasteiz bizirik dago, edo hori baieztatzen dute behintzat sareko txoko galdu batetik”.

“Jesus, Maria eta Jose!”-esanez hartu du batek baino gehiagok berria. “Bizia topatu dute, non eta Gasteizen, ene… nora ailegatuko garen!- beste askok harriduraren harriduraz. Ofiziala ez den arren, guk jakin badakigu baten batzuk poztu ere egin direla deskubrimendu sinestezin honen publikazioarekin: “Gora Gz2zirik!, Gora hiriaren taupada eta arnas diren ekimenak!”- bezalako oihu intsurgenteak entzuten dira Vitoriako lumpem-ari ostatu ematen dioten kale ilunetan barrena.

Saiatu gara ezkutuan mantentzen baina ezinezko bihurtu da. Komunikabideen, erakunde ofizialen eta gizarte beraren jakinmin masiboak erantzun baten beharra argi utzi du:

Bai, ofiziala egiten dugu. Blog honek ez soilik proposatu, baieztatu, ziurtatu eta exijitu egiten du “Gasteiz Hiri Bizia” bezala onartua izatea. Eta ideia horren atzetik, apurka- apurka, hementxe bertan, Gz2zirik leloaren azpian, hiriaren gorabehera eta ekimen desberdinen berri emango dugu: musika talde berriak, kontzertuak, erakustaldiak, jatetxeak, ikus-entzunezkoak…denek izango dute bere txokoa blog honetan.

Bere edukiek, denborak eta batez ere zuen iritziek esango digute azkenean arrazoia dugun edo ez. Egun hori heldu bitartean, guk geureari eutsiko diogu: Gasteiz bizirik dago!